Practicas

De Castras al Vendrell

Un viatge de classa

Joan Thomas, professor d'occitan, Licèu Bòrda bassa, Castras

Dempuèi qualques annadas fau un viatge amb los escolans de licèu al Vendrell, 30 000 estatjans a mièg camin entre Barcelona e Tarragona. Es un escambi. Los Catalans venon passar una setmana dins Tarn, dins de familhas que los albèrgan e los meus escolans van passar una setmana en Catalonha.

Los dos licèus son pas oficialament "bessonats" per çò que me sembla que lo Rectorat pausa tròp de contrenchas als escambis "ofialament bessonats". Estimi mai demorar liure dins ma practica e dins lo biais d'organizar las causas. Mon collèga se sona Jaume Figueras i Trull. Es evident que nos coneissem plan e que nos endevenem coma cal per montar solets aquel afar.

Classas: Segonda, primièra, terminala ;

Destinacion : El Vendrell (Tarragona) ;

Durada : Una setmana ;

Condicions materialas e administrativas : Lo licèu balha pas que 400 euros, lo de mai es pagat per las familhas 150 euros, puèi la comuna d'El Vendrell pren en carga totas las despensas sus plaça. Çò que pagan las familhas me permet tot bèl just de pagar lo carri o lo tren.

La temporada : Aquò se fa al mes de setembre/ octobre. Per dire qu'avèm tot l'an per contunhar l'escambi d'un biais espistolari. Aquò demanda d'aver l'assegurança de participacion dels dròlles e d'aver trobadas las familhas d'acuèlh al mes de mai que lo licèu tampa a la debuta de junh.

Contengut cultural : Tarragona e lo mond roman. Situacion sociolingüistica del catalan. Çò qu'es la "cooficialitat".

Contengut linguistic : Iniciacion al catalan sus la basi occitana, proximitat de las lengas. Far descobrir que l'occitan es lo caireforc geografic e lingüistic de la Romanitat.

Activitats de preparacion previstas en occitan amb los escolans : Lor balhi un vocabulari occitano-catalan de la vida quotidiana (cf. encadrat) puèi lor demandi d'aprestar d'exposats sus çò qu'anam véser per exemple Girona : preséncia de las tres culturas crestiana, josiva, musulmana ; Barcelona : lòc del poder politic, qu'es aquò la Generalitat ? l'autonomian El Vendrell ? Pau Casals, Angèl Guimerà, quals èran ?

Aquò me pren entre 7 e 9 oras de preparacion en classsa. Lor fau descobrir çò que veirem abans de partir.

Las competéncias lingüisticas son desvelopadas en occitan quand venon los Catalans a Castras. En Catalonha se passa en catalan. Dins l'intercambi los escambis se fan dins la lenga del país. Aicí, en occitan, la visita de Tolosa o del musèu Jaurès de Castras se fa en occitan per los joves Catalans coma pels meus occitanofòns. E al revèrs quand anam en Catalonha. Mas la dificultat es per ieu de lor far emplegar l'occitan per passar al catalan. Cal ben dire que d'unes fan pas cap d'esfòrces e qu'emplegan lo castelhan o l'anglés ; e aquò dins cada sens, vòli dire a Castras o al Vendrell.

Cada còp causissi un tèma de trabalh pels dròlles. Lo darrièr èra sus la premsa. Avèm visitat TV3, Radio e television d'El Vendrell ont s'es faita una emission en catalan e occitan sus l'actualitat de l'intercambi. Avem rescontrada la premsa d'El Vendrell. Un autre còp èra orientat sus la situacion politica amb visita de la Generalitat, lo rescontre amb lo deputat Joan Descals e la visita del Parlament de Catalonha.

Expleitacion e l'evaluacion

Es estat fins ara la realizacion d'un diaporama en power point. Una autra amira es de lor balhar enveja de gaitar cap al Sud per trobar un estagi de formacion en entrepresa, per anar estudiar.

Dempuèi que fau aquel escambi, n'i a d'unes que son totjorn en contacte amb lors amics catalans. De còps que i a de ligams fòrts se son faites, d'autres son anats estudiar puslèu a Barcelona qu'a Madrid. Totes son tornats amb lo sentiment qu'Occitania podiá aver un ròtle a jogar coma Catalonha al nivèl europèu e an descobèrt d'autres biaisses de pensar e de far. Me soveni per exemple de lor reaccion quand an vist al licèu d'El Vendrell la manifestacion contra la guèrra en Irac, cossí manifestavan los joves e s'exprimissián sus totes los subjèctes de societat mentre qu'elis demoravan jos d'interdiches. formateur

Aquel viatge a un ròtle educator evident al nivèl de la personalitat e de la formacion culturala, intellectuala personala. Lo trabalh pel professor es pron pesuc mas val mai aquel escambi que cent corses d'occitan en classa. S'i pòt far una autra formacion sul bilingüisme en relacion amb la realitat del bilingüisme o trilingüisme dins las familhas.

Pichòt vocabulari practic occitano-catalan

  • Per saludar
    • Bon dia!
    • Bona tarda!
    • Bona nit!
    • Hola!
    • A dèu!
    • A reveure!
    • Cossí vas ? Cossí anatz ? Com estas? Com esteu?
    • Ont vas ? Ont anatz ? On vas? On anèu?
  • Formulas de politessa
    • Excusatz ! Perdonèu!
    • Se vos plai ! Se us plan! Per favor!
    • Grandmercé Gràcies, Moltes gràcies.
    • e se respond : A vosté! De res!
  • Formulas utilas
    • Ont es la meuna cambra ?On es la meva habitació?
    • Quora sopam ? Quand sopem?
    • A quina oras nos cal anar al licèu ? Quand s'ha d'anar a l'institut?
    • Ont es la gara de Barcelona, se vos plai ? On es l'estació Sants, si us plau?
    • Prenètz lo metro ! Agafèu el metro!
Lenga e país d'òc, n°49, page 53 (05/2010)
Lenga e país d'òc - De Castras al Vendrell