Estudis

Catalougno e Prouvènço, pichot resumi de l'istòri d'uno freirejacioun

Jan-Marc Courbet, baile dóu Felibrige

Tèste establi pèr un libre qu'es à parèisse ounte sara peréu counta lou viage di Felibre en Catalougno en óutobre de 2008 emé li dicho, e counferènci prounounciado à-n-aquesto oucasioun.

Document (format PDF) :Catalougno e Prouvènço (documents iconografics)

Catalougno e Prouvènço soun ligado despièi de tèms e de tèms. Figuras-vous que devers lis an 970-980, i'avié en Arle dous fraire qu'èron tóuti dous ensèn comte de Prouvènço ; ié disien Guilhem e Roubaud. Aquéli dous fraire comte avien coucha li Sarrasin de Prouvènço en 972 e ansin pres touto autourita sus lou Coumtat de Prouvènço qu'anavo de l'Isèro à la mar, dóu Rose fin qu'is Aup.

1019 : Emma, uno descendènto de Roubaud se marido emé lou comte de Toulouso Guilhem "taio-ferre". A coumta d'aqui li comte de Toulouso aguèron de dre sus la Prouvènço.

1112 : Douço, uno descendènto de Guilhem (lou fraire de Roubaud) se marido emé Ramoun-Berenguié III comte de Barcilouno ; aquéu d'aqui devèn Ramoun-Berenguié Ier comte de Prouvènço. D'aquéu biais, si descendènt pourtaran pas lou meme numerò segound que saran counsidera coume comte de Barcilouno o de Prouvènço... ! A parti d'aqui li comte de Barcilouno aguèron de dre sus la Prouvènço. Douço avié peréu de dre sus lou Givaudan que trasmetra à l'Oustau de Barcilouno.

1125 : Fin de simplifica lis afaire e subretout li part financiero di diferènt descendènt (lis impost eisistavon deja !), la Prouvènço èi partejado en dous, en simplificant diren que : li païs entre Durènço e Isèro devènon lou marquesat de Prouvènço e passon souto l'autourita dóu comte de Toulouso ; li païs entre Durènço e mar devènon lou Coumtat de Prouvènço souto l'autourita dóu comte de Barcilouno. I'a desenant, e pèr de siècle, d'escàmbi regulié entre Païs d'O e Catalougno, entre autre de courrènt de migracioun dóu Massiéu Centrau emai dis Aup de Prouvènço vers Catalougno.

1213 : Lou comte de Toulouso Ramoun VI se declarè vassau dóu rèi Pèire II d'Aragoun. Lou rèi Pèire II d'Aragoun, comte de Barcilouno, ouncle dóu jouine Ramoun-Berenguié V, venguè assaja d'ajuda lou comte de Toulouso dins sa lucho contre li crousa "Picard, Alemand, Bourguignoun"; fuguè tuia davans Muret pèr li crousa de Simoun de Mount-fort.

Lou coumtat de Fourcauquié, d'abord independènt toumbè pièi dins la canestello di comte de Barcilouno en 1222.

Li comte de Barcilouno segnourejaran sus lou Coumtat de Prouvènço fin qu'à la mort dóu comte Ramoun-Berenguié V, en 1245. Es pèr acò que Mistral escriéura :

Cènt an li catalan, Cènt an li prouvençau,
Se partejèron l'aigo e lou pan e la sau

Après la mort de Ramoun-Berenguié V, lou coumtat de Prouvènço passè pèr maridage, au du d'Anjou, fraire de Louis IX (sant-Louis). Alor li liame entre Prouvènço e Catalougno s'escafèron quasimen.

Emé l'espelido dóu Felibrige

E pièi au siècle dès-e-nouven, vaqui pas que quàuqui jouvènt se diguèron de reviéuda lou prouvençau, parla de soun païs, de ié rèndre sa glòri. Pèr acò foundèron uno assouciacioun que prenguè lou noum bijarre de "Felibrige" ...!

1859 : Un d'aquéli felibre, que ié disien Frederi Mistral, publico uno meno d'epoupèio que ié met Mirèio... !

Li mitan literàri catalan, coume d'àutri en Éuropo, descuerbon lou prouvençau e Mirèio.

La memo annado, li catalan restablisson li Jocs florals à Barcilouno. Roumanille l'apren.

1861 : Un engeniaire chimisto e pouèto catalan, Damaso Calvet, vèn faire un viage d'estùdi en Franço. Lou 20 de mai es à Tarascoun ounte se debanon li Fèsto de la Tarasco, de felibre ié soun peréu.

Coume pèr asard, Damaso Calvet rescontro li felibre Aubanel, Bonaparte-Wyse, Mistral, Roumanille. En rèn de tèms aquéu mounde s'amigon.

Tre lou mes d'avoust, Mistral escriéu lou sirventès I troubaire catalan fin de lou presenta i Jocs florals de 1862 ; pouèmo fort ounte se pescon souvènt de citacioun, entre autre :

Car, de mourre-bourdoun qu'un pople toumbe esclau,
Se tèn sa lengo, tèn la clau,
Que di cadeno lou deliéuro

A coumta d'aqui s'establisson de relacioun epistoulàri entre catalan e prouvençau.

1864 : Pelay Briz publico la proumiero reviraduro de Mirèio en catalan, reviraduro en vers, forço procho dóu tèste ouriginau, assajo de moustra la parenta entre li dos lengo.

1866 : En juliet, lou pouèto e ome pouliti Vitour Balaguer rescontro Mistral en Prouvènço.

Mistral escriéu, au mes d'avoust, La Coumtesso que lou gouvèr de Madrid enebis de publica e recita en Catalougno. Pièi en setèmbre, gros escaufèstre en Catalougno ; d'ùni pouèto catalan soun tambèn de persounage pouliti, volon à tout lou mens l'autounoumìo de la Catalougno à respèt dóu poudé centrau de Madrid. Quand si revendicacioun se fan proun preciso, e proun duro, la rèino Isabela II foro-bandis li menaire catalan.

Aquéli d'aqui trobon recàti en Franço, en particulié en Prouvènço ounte lou primadié Jan Brunet li reçaup en Avignoun qu'èro en relacioun em' éli pèr d'àutri resoun. Louis Roumieux, souto-counsul d'Espagno, n'en reçaup quàuquis un a Nime.

Demié lis eisila, lou principau èro Vitour Balaguer. Rèsto dins l'oustau de Brunet, que, 'cò vai soulet, lou presènto is àutri primadié. Uno forto amista s'establis entre Balaguer e Mistral.

La Coupo e lou grand viage de 1868

1867 : Mistral, en setèmbre, escriéu dous sounet A-n-un prouscrit d'Espagno, Vitour Balaguer, evidentamen.

Quand li menaire pouliti catalan an l'autourisacioun de reveni dins soun païs, decidon de faire un presènt i felibre prouvençau pèr li gramacia de soun acuei. 1 800 Catalan respondon à-n-uno rampelado e baion de dardeno pèr óufri i felibre uno coupo d'argènt escrincelado. L'obro es fisado à Louvis-Guillem Fulconis que vòu pas se faire paga soun travai.

Aquesto Coupo es óuferto pèr li pouèto catalan lou 30 de juliet de 1867, à l'escasènço d'uno grando taulejado en Avignoun, dins la capello di templié, toucant l'oustalarié dóu Louvre qu'apartèn à-n-Ansèume Matiéu.

Evidentamen Frederi Mistral èro au courrènt qu'anavo se faire aquéu presènt e, pèr l'oucasioun, coumpauso la Cansoun de la Coupo.

1868 : Li Catalan counvidon li felibre en Catalougno. Dóu 28 d'abriéu au 13 de mai, Frederi Mistral, Louvis Roumieux, William Bonaparte-Wyse e Pau Meyer soun reçaupu en Catalougno quasimen coume de cap d'estat. Van à Barcilouno, à Mount-serrat, La Bisbal ... D'en pertout l'acuei es estrambourdant, amicau, calourous, ufanous... Mistral ié coumpausara Pèr Nosto-Damo de Mount-Serrat emai La Brassado, que recitara mantun cop dóu tèms dóu viage :

Counserven dóu passat li gràndi foundamento :
Lis aubre que van founs soun li que mounton aut ;
Mai tenen l'iue dubert autant que la memento
Vers lou libre aveni, lus que toujour aumento,
Caminen fisançous, sènso pòu ni ressaut.

Pièi, dóu 9 au 21 de setèmbre, li Prouvençau reçaupon à soun tour uno deseno de pouèto catalan à Nime, Maiano, Avignoun, Arle e subretout à Sant-Roumié ounte la fèsto durè 4 jour !

1874 : Es Albert Quintana qu'es delega pèr li catalan pèr assista i Fèsto ourganisado pèr lou cinq centen anniversàri de Petrarco.

Uno Coupo pèr li catalan

1875 : Lou Counsistòri, sus la proupousicioun de Louis Bonnet, decido d'óufri à soun tour uno Coupo i Catalan pèr refourti l'amista entre li dous pople e, de la pourgi en 1877, pèr lou desen anniversàri de l'óuferto de la Coupo Santo. Mai aquéu bèu proujèt s'entramblo à de proublèmo de dardeno, que li sòu de la souscricioun "se perdon" un pau... !

1876 : Quouro soun defini li proumié vertadiés estatut dóu Felibrige, 24 Majourau catalan soun designa, mai acò agrado pas gaire i Catalan. D'ùni pouèto esperavon èstre nouma Majourau e lou soun pas esta, d'àutri cregnon d'èstre trop dependènt d'uno direicioun prouvençalo dóu Felibrige e amèton pas que lou catalan siegue counsidera coume uno lengo d'O (es uno lengo de Si).

1878 : Finalamen, es soucamen aquel an d'aqui, lou divèndre 24 de mai, que la coupo es óuferto i Catalan au moumen di Jo Flourau de Mount-pellié ourganisa pèr la "Société pour l'étude des langues romanes". Es estado realisado, sèmblo, coume la Coupo Santo, vers l'ourfèbre Jarry, à Paris. Es baiado i pouèto Albert de Quintana e Marti i Folguera. Aquesto Coupo porto escri à soun entour "li noum di 7 prouvinço ounte règno nosto lengo, em' aquésti paraulo Li felibre de Franço i Felibre d'Espagno".

Es l'endeman, lou dissate 25, que se tèn un councous de pouësìo en l'ounour di lengo latino, uno coupo pèr lou proumié prèmi, óuferto pèr Quintana, es decernido au pouèto roumanesc Vasile Alecsandri ; pèr aquesto fèsto Frederi Mistral a coumpausa A la raço latino, mai foro councous.

1880 : Es lou millenàri de Mount-serrat. Roumanille es esta nouma presidènt d'ounour de la jurado di Jo Flourau que se debanon davans 5 000 persouno. La coupo óuferto pèr li felibre i Catalan es ouficialamen inaugurado à Barcilouno lou dilun 3 de mai de 1880, à l'óucasioun d'uno felibrejado ounte soun presènt peréu li majourau Louvis Roumieux e Ansèume Matiéu. Balaguer gardo aquesto Coupo.

1886 : Li 18 e 19 de juliet Jacinto Verdaguer es festeja em' estrambord à l'oucasioun de la fèsto de la Mantenènço de Lengadò.

1888 : Lou 28 de mai li felibre Camiho Laforgue, Frederi Donnadieu e Justin Pepratx assiston i jo flourau de Barcilouno.

1893 : Dóu 5 au 10 de mai, Felis Gras, tresen Capoulié, counvida i jo flourau, vai à soun tour en Catalougno. Après avé bèn discuti, li Majourau catalan abandounon soun titre e devènon mai simplamen "Sòci" dóu Felibrige. Reinié Jouveau, sènso mai de precisioun, escriéu dins soun Istòri dóu Felibrige de Felis Gras, à la taulejado baiado à la Coumuno de Barcilouno "il chanta la Coupo (il l'avait apportée)"; nous fau-ti pensa que li dos Coupo fuguèron reünido aquéu jour ?

Li liame entre Catalan e Prouvençau se desfan proun que si toco s'endevènon plus pariero, forço poulitic en Catalougno, quasimen pas en Prouvènço. De mai Mistral es en bono relacioun emé lou Valencian Llorente qu'amo pas gaire li Barcilounen...

1901 : Lou 14 de janvié, Vitour Balaguer defunto. Es ensepeli à Vilanueva i La Geltrú ounte se fara pièi un museon pèr serva si souveni.

Gràndi fèsto e grands espèr

1917 : Uno reviraduro de Mirèio, counsiderado coume la pus bello, èi publicado pèr uno pouetesso maiourquino, Maria-Antònia Salvà.

1919 : L'Espagno es restado nèutro dóu tèms de la guerro de 14, mai 20 000 voulountàri catalan se baton i coustat di Francés, 10 000 ié lèisson la vido ; en souveni d'aquélis ome mort sus lou prat bataié, lou mounde s'aubouron quand se canto lou darrié coublet de la Cansoun de la Coupo. Aquel an d'aqui uno grando fèsto se debano, li Catalan d'un coustat, li felibre de l'autre an fa escrincela uno espaso d'ounour pèr l'óufri au Marescau Joffre qu'es catalan. Es Valèri Bernard qu'a escrincela l'espaso óuferto pèr li felibre.

1923 : Tre 'quéu moumen s'establis uno courrespoundènci entre Marius Jouveau e lou courounèu Francesc Macia qu'es eisila e rèsto proche Paris.

1927 : Pèr la Santo-Estello, li 4, 5 e 6 de jun, uno delegacioun de Catalan, emé de dansaire, vèn à Mount-pellié, 49 an (7 x 7...) après li fèsto latino de 1878.

1928 : un grand pouèto, Guillem Colom, publico uno remirablo reviraduro de Nerto, publicara pièi devers 1933 uno reviraduro di Memòri e raconte, e pus tard encaro fara li reviraduro de Calendau, lou Pouèmo dóu Rose, la Rèino Jano, lis Oulivado. Lis isclo d'Or soun estado revirado d'à cha pau pèr Dono Salvà, qu'avié revira Mirèio.

1930 : Es l'annado dóu centenàri de la neissènço de Mistral. Dóu 26 au 30 de mai, li felibre soun reçaupu en Catalougno. Ié van entre autre lou Capoulié Marius Jouveau, Frederi Mistral nebout, Pèire Azema, Carle Grando, Louis Alibert... Li felibre soun reçaupu à la Coumuno, pèr l'Atenèu barcelounés, se fai uno escourregudo à Mount-Serrat e subretout lou 29 un mounumen à Mistral es inaugura dins li jardin de Mount-juich ; es esta esculta pèr Eusèbi Arnau.

Li felibre presènt bevon à la Coupo catalano, èro estado escoundudo 30 an de tèms à-n-aquéu moumen es lou decan di pouèto catalan, F. Matheu que la gardo.

Aquelo annado, de Catalan vènon à la Santo-Estello d'Avignoun e ié revendran l'an d'après à-n-aquelo de Pau.

1931 : La Catalougno devèn un gouvèr autounome dins la Republico espagnolo, lou presidènt de la Generalitat es Francesc Macia (nascu à Vilanova i la Geltrú en 1859)

1933 : Li felibre marsihés dóu Calen e li Catalan dóu Centre català ourganison un viage en Catalougno à l'óucasioun dóu centenàri de la Reneissènço Catalano. Dóu 15 au 19 d'abriéu, quicon coume 150 persouno, felibre e autre, soun reçaupu ouficialamen pèr Macia e soun gouvèr. Demié la delegacioun felibrenco i'a Antòni Mouren, Marius Dubois, Jòrgi Reboul, Pau Barlatier, de gènt de la Targo, de la Nacioun gardiano, de St Roumié, de Cano o de Nime ; i'a peréu lou Conse de Marsiho, Segne Ribot. Mai lou Capoulié i'es pas, qu'es pas esta counvida en tant que Capoulié... Lou jour de Nouvè, lou presidènt Macia defunto. Es remplaça pèr Lluis Companys.

1934 : Li catalan afiermon ouficialamen que lou catalan es diferènt de la lengo d'o ; causo qu'agrado pas en tóuti !

Lis annado negro

1936-1937 : à l'iniciativo de Pèire Rouqueto en particulié, soun coustitüi en Avignoun e à Marsiho de coumitat d'ajudo is inteleituau catalan. Pèire Rouquette aculis e recato en Avignoun entre autre : l'escrincelaire Casanova, l'istourian Soldevilla, Ventura Gassol, lou proufessour Carles Riba. Pus tard Pèire Rouquette sara un di foundadou de l'IEO e sara nouma Majourau dóu Felibrige en 1951.

1938 : à l'iniciativo dóu Calen de Marsiho, uno souscricioun es duberto pèr manda de viéure is inteleituau catalan, de noumbrous felibre, lou Capoulié en tèsto, baion de dardeno pèr acò (de milié de franc d'aquelo epoco, quicon coume lou pres d'uno veituro). De coumitat d'ajudo i Republican catalan s'ourganison un pau d'en pertout, ourganisa pèr de Majourau e d'escolo felibrenco, en Prouvènço emai en Lengadò.

1939 : 26 de janvié au 5 de febrié, Barcilouno e la Catalougno passon i man di franquisto. Lou 18 de febrié un decrèt de Franco ennebis lou catalan coume lengo óuficialo e d'ome pouliti, de pouèto catalan, vènon se recata en païs d'O ounte soun souvènt aculi pèr de felibre.

1940 : Lou 15 d'óutobre, liéura pèr la Gestapo de Franço, Lluis Companys es fusiha à Montjuich

1943 : La Coupo catalano servado dins la veirino di Jocs florals au Museo de Historia de la Ciudad de Barcelona es raubado lou 2 de desèmbre e disparèis...

1946 : Lou dijòu 16 de mai, lou grand vioulouncelisto catalan Pau Casals, acoumpagna d'ami catalan, vèn à Maiano jouga davans lou toumbèu de Mistral. Jogo la Seguido en ré de Bach, Lou cant dis aucelet, crido de rampelado di patrioto catalan, e enfin canto la Coupo Santo. Pau Casals en 1910 (avié 34 an) avié proumes à Mistral de veni lou rescountra .

1947 : Lou 27 d'abriéu, à Mount-serrat se fai "l'introunisacioun" de la Moreneta ; de naciounalisto catalan, de niue, van acrouca un grand drapèu catalan sus li roucas en dessus dóu mounastié, li sóudard de mountagno de Franco metran un brave moumen pèr l'ana despenja, segound la tradicioun ouralo...

1954 : Se remarco soulamen la presènci dóu sòci Ventura Gassol, de Barcilouno, à la Santo Estello dóu centenàri.

1959 : Emai siegon prim, li liame emé la Catalougno soun pas rout. Pèr lou centenàri de Mirèio, 7 "Mireille" venènt de 7 païs diferènt vènon à la Santo Estello d'Arle, Mireille Seros vèn de Barcilouno.

1967 : Pèr lou centenàri de la "Coupo", lou dimenche 9 de juliet, en Avignoun, se fai fèsto. Soun presènt pèr aquel evenamen d'inteleituau, de conse, l'archevesque de Tortosa, de group fóuclouri vengu de Catalougno, de descendènt de la famiho Fulconis coume Enri Pertus, la Nacioun gardiano e un fube de felibre. Es à-n-aquéu moumen que li coulège d'Avignoun prenon li noum di sèt primadié.

1968 : Li Catalan counvidon li felibre à veni festeja lou centenàri dóu viage de Mistral en Catalougno. Lou Capoulié Elìo Bachas meno la delegacioun, èi presènt peréu lou rèire-Capoulié Frederi Mistral nebout, la Rèino Viveto Jonnekin, de Majourau coume Leoun Teissier, Marius Rebière e uno quaranteno de mantenèire, entre autre dóu Flourège d'Avignoun. Aquéu viage, semblable à-n-aquéu de 1868, durè touto uno semano, dóu 12 au 20 d'óutobre. S'inagurè uno carriero Frederi Mistral, uno plaço Mirèio, se jouguè Nerto (en catalan) au castèu dóu comte d'Alba de Liste. li felibre anèron à Figueiras, Mount-serrat, Barcilouno, pièi à Maiorco ounte restèron tres jour, revenguèron à Villanueva i la Geltrú e finalamen tourna-mai à Barcilouno. Marius Rebière a counta aquéu viage ufanous dins la revisto lou liame d'abriéu de 1969.

Lou 24 d'óutobre, just après, defunto Frederi Mistral nebout.

1969 : Lou Capoulié Bachas publico un pichot libre sus "lou Liame catalan", qu'es soun discours ouficiau de l'an d'avans à Barcilouno, i'apound lou discours pèr la mort de F. Mistral nebout

1972 : Li grand jo flourau de Catalougno, supremi en 1937 soun restabli ouficialamen pèr l'alcade de Barcilouno.

1975 : Franco mor lou 20 de nouvèmbre

Uno respelido

1978 : respelido de la Generalitat de Catalunya, devèn uno regioun autounomo d'Espagno. Creacioun dóu CAOC - Coumita d'Afreiramen Óucitano-Catalan - pèr refourti li liame entre Païs d'O e Catalougno.

1980 : Pèr l'annado dóu cènt cinquantenàri de la neissènço de Mistral, lou Capoulié Reinié Jouveau, emai Lucian Durand, de persouno dóu CAOC se trobon à Barcilouno dóu dissate 8 au dilun 10 de nouvèmbre. Un cop de mai es uno tiero de recepcioun, en particulié à la Generalitat qu'a retrouba soun noum, de taulejado, de dicho e de moumen de remembranço dins uno Catalougno qu'a retrouba soun èime e sa lengo.

A l'epoco Segne Garriga Trullols es secretàri de la seicioun catalano dóu CAOC.

Lou dissate 8, evenamen remirable, sus li cop de miejour, au castèu de la Teià, Segne Luis August Vinyamata, comte d'Alba de Liste, remet emé soulenita, au counseié à la culturo de la Generalitat, la coupo ouferto pèr li felibre i pouèto catalan e qu'èro restado escoundudo despièi 1943 ; èron presènt aqui lou Capoulié Jouveau, Lucian Durand emai Roubert Lafont e Pèire Pessemesse ; dóu tèms d'uno taulejado, un d'aquésti venguè ansin "s'erian resta felibre, aro sarian tóuti Majourau !", ço dis la tradicioun ouralo.

Desenant la coupo di Catalan es servado dins l'Oustau de la Generalitat.

1981 : Pèr la dimenchado di 13 e 14 de mai, en Avignoun e à Maiano lou Capoulié Jouveau, li felibre, l'Acadèmi prouvençalo, lou Riban de Prouvènço, reçaupon de Catalan, ome pouliti, escrivan e membre dóu CAOC Dono Xapelli, Segne Garriga, Segne Sala ...

1983 : Lou dissate 16 d'abriéu, à Perpignan, lou Capoulié Pau Roux, acoumpagna d'un group de felibre, adus la Coupo Santo e de soun coustat lou presidènt dóu Parlamen de Catalougno, Segne Heribert Barrera, adus la Coupo di Catalan. Dins la salo dóu Cèntre cultural català, es lou proumié rescontre di dos coupo que se turton lougieramen dins un din-din mai-que-mai esmouvènt davans uno centeno de persouno, d'ùni retenon emé peno l'aigo que ié vèn is iue. En seguido, dous jour à-de-rèng, i'aguè fèsto à Perpignan emé sardano e taulejado, dicho e estrambord poupulàri.

1987 : La Santo Estello se debano à Perpignan e lou dimars lou Capoulié Pau Roux e un grand noumbre de felibre se gandisson à Barcilouno. Soun reçaupu à la Generalitat, pièi van à Montjuich.

2001 : Lou dissate 20 d'abriéu, lou Capoulié Pèire Fabre, en counmemouracioun dóu centenàri de la mort de Vitour Balaguer, adus la Coupo Santo à Barcilouno e li dos Coupo un cop de mai se retrobon espausado ensèn.

Pièi li 6 e 7 d'óutobre, à Sant Geniès di Mourgo, en Lengadò, li Catalan aduson la Coupo óuferto pèr li felibre e lou Capoulié Pèire Fabre adus la Coupo Santo, es un nouvèu rescontre di dos coupo, tant pèr countunia de celebra la despartido de Balaguer que pèr participa à la semano éuroupenco di lengo. Aqui se debanon coulòqui, messo en lengo nostro, espousicioun, e dins lis areno davans li dos coupo espausado, court d'amour, danso e jo gardian.

2004 : Au mes de febrié, pèr lou cènt-cinquantenàri dóu Felibrige, lou Capoulié Pèire Fabre porto la Coupo au rescontre de sa sorre à la Generalitat de Barcilouno emai au Parlamen catalan. Avèn pouscu vèire d'image d'aquéu viage e dóu rescontre dins lou film realisa pèr AMDA Frederi Mistral de A. Glasberg e J-P. Belmon qu'èron dóu viage.

Dóu 9 au 12 d'óutobre, lou Baile de l'epoco, qu'èro Jaque Mouttet, anè à soun tour à Barcilouno representa lou Capoulié i fèsto ourganisado pèr lou cènt cinquantenàri dóu Felibrige e lou centenàri dóu prèmi Nobel de Mistral. Èron tambèn dóu viage lou group "La souco tarascounenco". Un cop de mai i'aguè recepcioun à la Generalitat, à Mount-serrat, au Parlamen e en mai tout lou mounde anè à Ripoll se reculi sus lou cros de Jaufre lou Pelous, proumié comte de Barcilouno (aquéu qu'avié reçaupu dóu rèi de Franço, Carle lou Pela, lis armarié : d'or à quatre pau de gulo), e sus lou cros de Ramoun-Berenguié III de Barcilouno, 1er comte catalan de Prouvènço.

2008 : Es lou cent-quaranten anniversàri dóu viage de Mistral en Catalougno e fai sèt an que li dos Coupo se soun rescountrado à Sant Geniès. Vous n'en faren lou dedu, belèu, dins quàuqui tèms !

Bibliografia

  • Durand Lucian Prouvènço, Catalougno, Pouësìo ; Ed. Prouvènço d'aro, 1991
  • Jouveau Reinié, Histoire du Félibrige, autò-edicioun, 1971 à 1984
  • Mistral Frederic, Lis Isclo d'or ; edicioun critico establido pèr J. Boutière, Didier, 1970 lis Armana prouvençau e di Felibre : 1869,1879, 1931, 1934, 1984...
  • Jouveau Reinié, Provence & Catalogne, Santo Estello,1987
  • Bachas Elìo, lou Liame catalan, l'Astrado, 1969,
  • Fulconis, A-P. Louis Guillaume Fulconis (1818-1873); autò-edicioun, 2005 Arts et livres de Provence, N° 45 - 1960.
  • Lou Liame, revisto de l'escolo dóu dragoun, avril 1969.
  • Prouvènço, Dau ! N° 80 - avril 1983, "grando fèsto de la coupo santo di catalan" p. 3
  • Prouvènço d'aro - nouvèmbre 2001, "la fèsto di dos copo -Prouvènço e Catalougno" p. 8-9
  • Rafanell August, La il.lusió occitana, Quaderns crema, Assaig, 2006.
Lenga e país d'òc, n°49, page 25 (05/2010)
Lenga e país d'òc - Catalougno e Prouvènço, pichot resumi de l'istòri d'uno freirejacioun