Practicas

Far la senhaletica dau licèu

Un exemple de pedagogia accionala

Mathieu Poitavin, Professor certifi cat d'occitan-lenga d'òc, en pòste a Aurenja

Quand lo professor de provençau tòrna d'un romavatge linguistic a Barcelona pensa d'aver trobat la solucion per rendre son ensenhament mai vesedor, au mens dins son quite establiment. La dobla senhaletica castelhana - catalana sus lei parets dau metro, sus lei panèus deis autorotas mòstra la fòrça e la normalizacion de la lenga. Se pensa qu'es aquò que faudriá engimbrar en cò sieu per rendre evident son ensenhament. E qu'aquò, tanben, es mai que mai indispensable per la consciéncia ciutadana de totei liceans.

La primièra cibla que pòu èstre tocada per la dobla senhaletica son lei liceans que coneisson pas la lenga e sa cultura. Per l'ensenhaire, aquel exercici fa figura d'una promocion de l'opcion e ié evita lo penible pòrta-a-pòrta de la rintrada. Idealament se pòu jutjar que l'escolan lambdà a la vista dei panèus omnipresents dins sa vida vidanta se pausarà solet lei questions necessàrias : "Perqué aquelei panèus son aquí ? Dins quina lenga es escrich? Qu'es aquela lenga tant pròcha de l'espanhòu, de l'italian e a l'encòp dau francés que sembla dire mon país e qu'es estampada d'en pertot ? Perqué aquela dobla senhaletica quora vau a la cafeteria ? En classa ? Dins lei corredors ? Dins lei salas ? De qu'es l'utilitat d'aquela lenga que s'ensenha aquí ? Perqué es marcada a egalitat amé lo francés amé lei memei caractèrs, dins lei memei colors ?" Finala, la senhaletica dins un licèu es un apèu ai responsabilitats linguisticas d'un Europenc que s'ignòra. Ié farà pausar de questions sus l'aprendissatge dei lengas e seis estatuts. Es una marca pedagogica fòrta que jòga positivament sus lei consciéncias.

(c) Mathieu Poitavin

Lo segond public que serà directament concernit se tròbra èstre aquelei que seguisson l'opcion regularament. En defòra de la nòta, quina reconèissença de veire son panèu causit escrich en letras capitalas sus lei parets d'un licèu ! Quin aprendissatge en autonomia per crear aquelei panèus ! L'aprendissatge deu passar per una accion, per un projècte, per quicòm que renda la lenga necessària. S'agís de religar progression de l'aprendissatge e implicacion de la classa dins un projècte e de practicar la lenga en l'aprene, e d'aver de bònei motivacions per aquò faire. Ansin podèm far referéncia au grand principi de l'ensenhament dei lengas, eissut dau cadre europenc, CECRL, qu'afavoriza la practica d'una "pedagogia accionala". Legissèm dins lo palier 1 dei collègis : "La langue est un instrument qui intervient dans la réalisation de la plupart des tâches sociales : il s'agit à chaque fois de mener à bien un projet, d'atteindre un objectif, de résoudre un problème. Les tâches exigent en général la mise en oeuvre de la compétence langagière. En milieu scolaire, c'est cette compétence qu'il s'agit de développer..." (BOEN HS. 06 25 août 2005).

Un partenariat amé arquitèctes e grafistas va metre l'escolan en relacion amé lo monde dau trabalh. L'aprendissatge de la lenga ven concret. Serà encoratjat. Aquela creacion escolara va doncas passar per d'etapas necessàrias : la bastison dau projècte e sa realizacion.

Bastir lo projècte

Es un projècte que se bastís dempuèi 2007. Ven de la soscadissa collectiva d'un recampament de gents d'escolans per defendre l'ensenhament dau provençau en Aurenja : Ben lèu. Mercés a Ben lèu, avèm poscut veire se crear de polits projèctes pedagogics coma de classas a tèma Provença dins un collègi ZEP de la mema vila. Aquelei classas respondon a una demanda de la Calandreta d'Aurenja per aguer una seguida au bilinguisme. Aquela demanda se perlònga idealament au licèu per posquer contunhar l'aprendissatge. Ben lèu ajuda financierament per lei sortidas pedagogicas e lei crompas de libres per leis establiments. Per aquò adoba quinas, tombolàs e dictadas provençalas. Fa viure la lenga dins la ciutat. La quina de Nové, per exemple, es un mejan de dubertura dau collège ZEP en totei lei familhas per afovarizar comunicacion e socializacion dei culturas.

Lo liame entre privat, public e associatiu foncciona coma aquò per sola idèia de prepausar un ensenhament dau provençau logic e ligat dins son perlongament pedagogic. Siáu lo professor unenc que liga lei dos establiments publics sus 18 oras. Vau insistir sus una de nòstrei tòcas : volèm mostrar qu'aquel ensenhament dau provençau es ligat a una dubertura d'esperit laïc. Ansin practicam lei doas grafias per pas oblidar leis actors passats ni presents qu'an fan de la lenga nòstra una granda cultura dau país e d'Europa tota.

Aquela mesa en situacion facha, vau explicar lo projècte que nos interessa : la dobla sinhaletica francesa-provençala d'un establiment. Ven de la soscadissa d'un arquitècte que baileja l'associacion : Bernard Vaton. Se la lenga sembla vesedoira a l'escòla, l'es de mens en mens dins la vida vidanta. Fau que la lenga siágue vista. La sinhaletica permet d'un biais eficaç de s'avisar de la nòstra realitat lengatgièra. En Aurenja, lo luòc causit per aquela dobla sinhaletica es lo licèu de l'Arc. Bernard Vaton qu'a un sèti au Consèu d'Administracion dau licèu, mercés a son fiu qu'estúdia lo Provençau, farga un dorsier qu'explica lei tòcas nòstras.

Es interessant, me sembla, de legir coma bastiguèt son argumentacion e coma la presentèt. D'en primier, fa referéncia au passat de l'ensenhament dau provençau per nos donar una legitimitat istorica e culturala. Escriu en francés per èstre legit puèi escotat per lo consèu : "Le lycée de l'Arc d'Orange est un des lycées de Provence où l'enseignement du Provençal est traditionnellement présent. En effet, un cours y est proposé aux élèves depuis plus de cinquante ans". Oblida pas, per faire autoritat de rampelar l'istoric d'òmes famós que marquèron la lenga : "N'oublions pas que des personnes célèbres, comme par exemple la majoral du félibrige et poète Pierre Millet, ont exercé cette fonction". Contunha sa dicha en desenvelopant l'utilitat sociala : "Il serait bienvenu que l'on ouvre les tiroirs de la culture pour sociabiliser le Provençal". Enfin, e çò mai important, l'arquitècte insistis sus la valorizacion deis aprendissatges per nòstreis escolans. Puèi prepausa un projècte financier. Que serà votat per lo consèu. L'argent per nos ajudar vendrà dau licèu e de l'associacion Ben Lèu mercés ais accions realizadas per leis escolans e sei gents. Aurem drech a una ajuda de la Region.

Definir leis objectius pedagogics

Ara, pedagogicament, nos fau explicitar lei objectius nòstres. La tasca primièra es de far prene en carga la senhaletica per lo grop d'escolans d'occitan. Leis escolans causits sont lei 15 que seguisson l'opcion en primièra e segonda en ensenhament facultiu ò de determinacion. Lo grop a tres oras la setmana, dispausadas per sesilhas d'una ora caduna.

Lo projècte pedagogic serà mes en plaça a la fin dau primier trimèstre escolar 2008-2009. Compti de bailejar lo projècte amb una sequéncia de sièis sesilhas, per començar. Lei panèus seràn lests e plaçats en mai 2009. Per afortir la preséncia dau provençau dins l'establiment una fèsta d'inauguracion se devriá faire a la rintrada 2009-2010.

L'interès d'aquela demarcha que se pòu dire "macrò-tasca" en tèrmes de pedagogia accionala1. S'agís de :

  • faire fonccionar la lenga dins l'encastre de la realizacion d'un projècte, amé leis objectius de comunicacion lengatgièra coma se van rencontrar normalament dins lo cors d'aquesta realizacion e en foncion dei besonhs de l'expression ligada a l'accion : s'informar, a l'oral e a l'escrich, expausar, argumentar, convéncer, dialogar... Aquí seràn mesas en òbra lei competéncias lingüisticas de locutors qui situam entre A2 e B1, disèm en cors d'aquisicion dau nivèu B1. Dins la progression de l'aprendissatge lingüistic, faudrà per exemple faire intrar lo lexic de l'arquitectura, e au nivèu gramaticau assegurar d'uneis estructuras de l'argumentacion, soscar a la formacion e a l'emplec dau subjonctiu present...
  • de faire intrar lo provençau dins la vida vidanta, lo socializar e n'en cambiar l'imatge en cò deis escolans. Faire crosar lo monde de l'entrepresa amé leis aprendís balha una utilitat sociala. Aquí, per exemple, leis escolans obraràn de cotria amé un grafista e un arquitècte. Descubriràn dos mestiers que lei pòdon interessar per l'orientacion professionala.
  • de permetre ais escolans d'apregondir sa cultura provençala e sa cultura generala. Metodologicament, auràn de faire de cèrcas sus internet, d'expausar lei resultas, de justificar sei causidas culturalas, per lo nom de donar a tau luòc per exemple.

Realizar lo projècte

La sequéncia pedagogica es realizada a despart dau dorsier de demanda de subvencion dau projècte de Bernard Vaton. L'òme vendrà un personatge de ficcion per realizar leis exercicis : se trobarà dins leis exemples dei conjugasons, dei fonccionaments dau lexic, utilizarem un materiau qu'inspirarà ò que serà inspirat per sei plans e sei fotòs. Partem de lònga dau concret. La nòstra tòca es l'apropriacion e la personalizacion dau projècte per leis aprenents.

Sesilha 1 : menar un jòc de ròtle

Lo primier exercici serà un jòc de comunicacion. A la debuta, lo dorsier de l'arquitecte amé argumentacion e budgècte serà pas distribuit ais escolans. Lo devon fargar elei. Lei presènte en classa coma lei solets responsables de l'òbra. Partèm a la debuta sus lo ton de la discutida en provençau. La sala de classa es dispausada en U per afavorizar la charradissa e nos metre au meme plan entre ensenhaire e ensenhats dins l'escambi. Aquela disposicion particulara de la classa ajudarà per l'activitat seguenta. Pause la question : "Se fau nommar lo licèu en lenga d'òc, coma fau faire ?". Leis escolans fan d'ipotèsis. Marcam aquelei que nos menaràn au projècte concret. Aqueste biais permet de mestrejar lexic e conjugason.

Leis ipotèsis pausadas evòcan l'encastre administratiu d'un licèu. E assajam de devinhar, d'un biais teatralizat, lei reaccions, lei oposicions, ò empatia deis uns e deis autres. Puèi per apregondir, leis escolans se botan en grop de dos. Cada chorma representa una entrepresa que prepausa lo projècte. Lo demorant deis escolans seràn lei administratius. Cadun son torn serà president, administratiu, secretària, eça... La consinha es escricha sus papier. La preposicion serà facha en provençau.

Vaquí lei consinhas : "Siás un arquitecte. Vòls vendre un projècte que consistariá de faire de panèus bilingas dins un licèu. Dins l'Acadèmia d'Ais-Marsilha, as causit "Lo Licèu de l'Arc" en Aurenja. Ara fau faire passar lo projècte au Consèu d'Administracion. Tròba quatre rasons per faire una sinhaletica dau licèu de l'Arc au provençau. Fau vendre son projècte e èstre convencent. Siás liure de trobar lo biais originau que vòls. Pòs te pausar lei questions seguentas : Coma introdusir d'un biais interessant mon projècte ? Perqué Aurenja ? Perqué lo Licèu de l'Arc ? Ròtle e importància dau provençau dins la region ? Ròtle e importància dau provençau dins la cultura ? Dins l'ensenhament ? Ton argumentacion serà orala. La presentaràs a l'orau. A l'orau durarà entre 5 e 10 minutas".

Leis escolans se prenon au jòc sens relambi. La mesa en scèna tòca au versemblable. Lo projècte de cadun es votat a man levada pendent cada (faus) Consèu d'Administracion. Leis emocions d'una tala reunion son reprodusidas, a l'instinct per lei liceans : avèm leis opausants, lei simpatisants, aquelei que roncan. N'i a sempre un que pensa de jogar aqueu qu'es contra la lenga, e sempre l'autre qu'ajuda au projècte. L'exercici es positiu per un primièra oralizacion de la lenga, abans l'orau de provençau en Terminala. Demanda d'originalitat creatritz : quauqueis uns nos van prepausar ja la forma dei letras que seràn presentas sus lei pòrtas, lei dessenhs, lei caractèrs e crean d'eslogans per l'entrepresa coma per lo projècte. Per tornar a l'oralizacion de la lenga, permet de mestrejar sa paur e d'afrontar l'agach d'un public. Lo vocabulari de l'establiment (lei teulissas, lei parets, l'òrt, la paret d'escalada, las salas, la cort de recreacion...) comença de s'activar. La lenga a una activitat sociala. Enfin, quora començan de sonar la sala polivalenta Leo Lelée, Fréderic Mistral ò Max Rouquette, començam de veire que leis escolans possedon una bona cultura e consciéncia de la lenga d'òc. Pausa la question de la plaça de l'utilitat de l'escòla dins lo concret : perqué pas prepausar de projèctes en provençau per monstrar son originalitat e sa riquesa dins lo monde dau trabalh quora serai dins la vida vidanta ?

Sesilha 2 : montar un budgècte e cercar de noms

La segonda sesilha prepausa parier un trabalh de grop dinamic. Leis escolans son repartits en grops de tres ò quatre. Ara, lei tascas prepausadas an una importància màger. Cada grop a una ficha coma aquò : "Mon budgècte : imagina lo budgècte que pòs prepausar au consèu d'administracion. Per aquò, te prepause de te passejar dins lo licèu e de notar totei lei salas, pòrtas e intradas onte se podrián botar de panèus. Passeja-te. Troba lei luòcs. Compta-lei panèus necites...A tant lo panèu... qu'es lo budgècte previsionau ?"

Una consinha de mai, per una tasca parallèla, prepausa de marcar la revirada deis endrechs. Enfin, una tresena tasca es de nommar de luòcs en faire referéncias ais artistas, pintres, escrivans famós qu'obrèron per la lenga. Cada talhier pòu aguer una tasca diferenta demest lei tres prepausadas.

L'importància de la consinha es afortida que lo trabalh rendut serà legit per Bernard Vaton e mandat puèi au grafista encargat de dessenhar lei panèus. Serà pas verificat après. Seràn lei responsables dau trabalh acabat. Un escolan serà nommat dins lo grop per notar lo nombre de pòrtas, de panèus, lo nom d'aquelei panèus, una colona serà escricha en francés, l'autra en provençau. Aquel exercici permet de reactivar lo lexic de l'arquitectura, d'acomplir un exercici de reviradura francés-provençau, la passejada dins lo licèu sotalinha una primièra socializacion de la lenga e impausa una autonomia de lenga en grop. L'objectiu culturau es reactivat.

Sesilha 3 : assegurar los aquesits lexicals e morfologics

La tresena sesilha, mai classica, entre professors e escolans prepausa de reactivar e de pausar lo vocabulari aquesit en arquitectura sus una dobla ficha fotocopiada. Leis escolans an de nommar sus un plan totei leis elements d'un licèu. Amé una sageta botan lei mòts : "Pòrta - Pòrta d'intrada - Fenèstra - Fenestron - Drapèu provençau - Cortinas - Bartàs - Parcament dei veituras - Teulissa - Aubres - Òrt - Ostau d'acuèlh - Escaliers - Pelenc - Bibliotèca - Dormitòri - L'establiment"

D'exercicis d'ipotèsis seràn prepausats per aquesir lo subjonctiu present.

Leis escolans an pas agut entre lei mans lo dorsier vertadier dau creator. En fin de sesilha, comparam lei budgèctes qu'avián prepausat a passa-temps. Un autra micrò-tasca se presenta a nos : comparam parier leis arguments prepausats per elei e aquelei de Vaton. E prenon consciéncia entre ipotèsis e realitat de la vida activa. En provençau.

Sesilha 4 : trabalhar la competéncia de compreneson de l'escrich ...

La quatrena sesilha, que se divisís en doas oras, aprepara la venguda dau trabalhaire dins la classa. S'agís de legir un tèxte escrich a quatre mans amé Françoise Pina-Longuet e publicat dins leis Actes d'Universitat d'Estiu de 2004 per la MARPOC, a Nimes. La descubèrta dau tèxte permet de prene consciéncia que la lenga pòu dire quicòm mai que la literatura, faire de teorias en partent dau passat per inventar l'avenidor. L'article evòca l'arquitectura neo-provençala. Coma bastir d'un biais ecologic e soscat a partir deis aquesits deis ancians ? Leis autors explican coma utilizar la vegetacion, situar leis ostaus a rapòrt de l'environa amé lo saupre-faire deis avis nòstres. En faire un bilanç de çò que se bastís en Provença, permet de descubrir lo lexic especific de l'arquitècte e tanben de nocions complèxas coma : "fonccionalisme, arquitectura, abitat, ostau, regionalisme, neo-regionalisme, bòria, tèules, muralhas, façadas, vitre, genovesa, orientacion climatica..." La lenga es un element de creacion modèrna. Per reactivar lo lexic, obram sus un plan dessenhat per lo mèstre. Situat sus lo quite document. La causa escricha aprepara lo rescòntre en provençau amé Bernard Vaton. La sesilha s'acaba per un jòc orau, d'invencion e de compreneson de l'orau : "Qu'es ton licèu ideau ? Utiliza lo subjonctiu present per va dire."

Rescontram per lo primier còp Bernard Vaton. Arriba l'ora seguenta. Reactivam amé leis escolans lei causas apresas per son tèxte : "Vos rapelatz dau tèxte de Bernard ? Coma èran bastits leis ostaus en Provença ? Podètz me dire sei situacions geograficas ? Lo materiau utilizat ? Segond l'autor, de qu'èra lo pecat de l'ostau modèrne en Provença ?" Puèi l'arquitècte demanda de causas precisas : lo relevat dei panèus, fargat en sesilha doas. Enfin, nos explica, en dessenhant au tablèu, tot en provençau, lei diferentei tipografias per anonciar lei membres de l'establiment (letras capitalas, minusculas d'imprimariá lei causidas esteticas....) La mitan de la sesilha s'organiza per un trabalh de creacion. Cadun deu dessenhar lei indicacions dei pòrtas segon seis inspiracions. Aquò fa obrar l'imaginacion e lo trabalh ortografic. L'aquesit culturau es present : un dessenharà la beguda Massilia en s'inspirant dau pintre nissart : Ben. Greda blanca sus lausa negra. Un autre me prepausarà lo còp que ven un projècte similari a la presentacion de l'arquitècte : leis membres marcats en provençau sus un montatge fotografic fargat a l'ordinator. Una bòna suspresa. La sesilha s'acaba per un vòte sus la causida dei personalitats provençalas qu'auràn drech a sei panèus. Bernard Vaton escota. Marque lei preposicions au tablèu. Es pas satisfach que lei noms causits que, segond èu, son tròp classics e pas pròches de la realitat de la Vau-Clusa. Nos prepausa de faire una cèrca au CDI per conéisser mielhs lei celebritats qu'an marcat la region mercés au Provençau. Çò qu'adobarai en sesilha cinc.

Sesilha 5 : cercar de noms !

La sesilha cinc permet la descuberta de sa provençalitat a la bibliotèca. Lo primier jòc es de trobar dins l'espaci tot, libres, premsa e enciclopedias que concernon la lenga. Son susprés de veire que siam abonats a Aquò d'Aquí, Li Nouvello de Prouvènço, e La Setmana. Tròban la laissa "Provençau".

E començan de furnar dins lei biografias en me pausant de questions. Puèi, una cèrca sus Internet serà prepausada. Serà evaluada per la seguida. La ficha se presenta amé lei consinhas seguentas : "Evaluacion. Au CDI, òmes e femnas istoricas d'Aurenja : "Sus internet cèrca un òme vò une femna d'Aurenja (vò de Droma e Vauclusa) qu'a marcat l'istòria de la region. Pòu èstre un personatge istoric, mòrt vò actuau. Fau qu'ague un liame amé l'istòria de Provença, sa cultura, sa creacion. Marca son nom en francés, cita ta sòrga, marca son nom e son pichon nom en provençau, en 10 regas en provençau, marca sa vida precisa aquí. L'ortografia provençala dèu èstre respectada. Deves redigir de frasas."

Lei noms trobats e causits per vòtes lei còps seguents seràn : Raimbaut d'Aurenja, Pèire Millet, e Massilia Sound System. Tres noms que marcan la literatura de l'atge mejan, la literatura provençala, e la modernitat. Lei vidas causidas seràn corregidas en classas. Pèire Millet serà presentat en grafia mistralenca. Aqueleis òbras seràn estampadas puèi a costat de cada pèça : "Sala polivalenta : Raimbaut d'Aurenja, CDI Pèire Millet, Cafeteria Massilia". Plus tard, sus lo meme biais, Vaton nos prepausarà de causir e votar per lei grandrei frasas qu'an marcat la lenga. Serà causida, en grafia mistralenca : Quau tèn la lengo, tèn la clau, signada dau mèstre de Malhana. E que prendrà tota una paret de la cort en caractèrs gròs e pintat per lo personau dau licèu. E la devisa de l'Institut d'Estudis Occitans : La fe sens òbra mòrta es que serà marcada sus una colona de l'intrada dau licèu.

Sesilha 6 : reemplec en descontextualizacion

La sesilha sièis marca un bilanç en classa. Lo cors es frontau : mèstre/escolans. Fasèm de revisions escrichas sus lo vocabulari aquesit. Per aquò, trabalham sus una plan de l'Ostau Blanc qu'Obamà ven d'èstre elegit. Lo jornau Liberation nos prepausa l'arquitectura dau luòc. Per jogar, a l'orau, e faire una clucada discreta a l'actualitat, assajam de revirar cada pèça dau francés au provençau e de còps que li a leis anglicismes que son pas estats revirats per lo jornalista (East Room = Cambra de l'Est). Aquela revision risolièra me permet d'anonciar l'evaluacion per lo cors seguent. S'acaba per un exercici a traucs sus lo subjonctiu pertocant a l'actualitat, la nòstra e la dau monde. Son reactivats dins la consinha deis exercicis : "Complèta amé lo subjonctiu present dau vèrbe èstre : se pòu qu'un president de color... elegit. Fau que l'arquitecte dau bastiment... Bernard Vaton".

La sesilha set anóncia la fin de l'òbra comuna. Serà l'ora de faire un bilanç escrich sus lei aprendissatges. Es l'evaluacion finala. D'un biais classic, demandarà de situar d'elements dau lexic sus un plan, una aplicacion dau subjonctiu (amé d'exemples de lònga en relacion amé lo nòstre projècte) sus un exercici a traucs. Enfin, lei parlaires auràn un exercici de mai de redigir : imaginar lo licèu de sei pantais en utilizant lo subjonctiu present e en reactivant lo vocabulari aquesit. Quora lei panèus seràn pausats, podèm imaginar una grasilha que leis escolans podràn comparar amé lo projècte d'origina, per botar en valor çò que fuguèt pantaiat per elei. De tablèus comparatius divisits en dos amé çò que prepausèron e çò que fuguèt refusat ò acceptat.

Conclusion

Es una sequéncia que demanda temps e investissament. Pasmens, liga la lenga dins un nivèu sociau e fa sa promocion d'un biais positiu. Permet d'obrar amé leis actors sociaus dau país. E mòstra un costat positiu e vivent de la lenga : creatiu, colorat, e fach per lei jovents. La lenga es mostrada coma una utilitat necessària per lei desplaçaments dei personaus. Interròga lei badaires sus son ròtle dins la societat.

Leis escolans se son investits sens renar. E la progression en escritura coma en coneissença linguistica e culturala ven remirabla. Esperem qu'a la fin de son escolaritat, quora quitarà l'establiment, lo licean se ramentarà sempre qu'i a laissat sei piadas ! Sens nostalgia, esperem qu'aquò lo marcarà per ié fargar una consciéncia. E que s'interessarà mielhs ansin ai lengas, ai culturas e ai literaturas dau monde.

Siam a la debuta dau projècte, faudrà explicar lèu dins un numerò venent de Lenga e País d'Òc, lei reaccions deis escolans, deis administracions e segurament d'aquelei joines que qu'evoluan desenant dins una dobla sinhaletica. Es que lor vision de la lenga n'es estada cambiada ?

Exercicis

1. Siás un arquitècte.Aquí un establiment qu'as bastit de tei mans. S'agís d'un establiment escolar. Sus lo plan, assaja de nommar cada element amé una sageta : Pòrta - Pòrta d'intrada - Fenèstra - Fenestron - Drapèu provençau - Cortinas - Bartàs - Parcament dei veituras - Teulissa - Aubres - Òrt - Ostau d'acuèlh - Escaliers - Pelenc - Bibliotèca - Dormitòri - Licèu.

2. Utilizacion dau subjonctiu present dins lo projècte arquitectural. L'architècte Vaton deu convéncer lo consèu d'administracion de farga de luòcs en Provençau. La mitan es franchimanda mai l'autra mitan es provençalista. Es oblijat de parlar Provençau per sedusir aquèsta clientèla. Necessitat d'una reviradura. Ajuda-lo en emplegant lei bòns temps dau subjonctiu present !

"Pour que cette signalisation soit efficace il faut qu'elle soit présente dans de nombreux lieux de l'établissement. On doit insister pour que la signalisation soit la plus complète et soit pour un grand progrès pour la pratique de la langue par les élèves." (Vaton)

Revirar au provençau :

  1. Il faut que la signalisation du Lycée de l'Arc soit finie avant la fin de l'année.
  2. Il faut que les portes soient rouges et jaunes comme le drapeau provençal.
  3. Il faut que tu deviennes un grand architecte.
  4. Il faut que nous soyons précis pour donner à chaque lieu le nom d'un félibre.

Cerquem au CDI e expausem a l'orau :

  1. grop un : explicatz en provençau quau es un Felibre.
  2. grop dos : presentatz Frederic Mistral.
  3. grop quatre : quau èra Pèire Millet ?
  4. grop cinc : trobatz cinc artistas modèrnas (cantaires, pintres...) de lenga d'òc e presentatz lei de vòstre biais.

    Premsa :

  • "A l'intérieur de la maison blanche" in Libération, 04/11/08.
  • "Aurenjo, despartido dóu Majourau Pèire Millet" in Li nouvello de Prouvènço, été 1998.
  • Revistas :

  • Pina-Longuet Françoise, Vaton Bernard, "Arquitectura e Occitanitat", in Universitat occitana d'estiu, Actes de l'Université 1994, réunis par Jòrdi Peladan, Marpoc, Nimes, 1996.
  • Textes :

  • Vaton Bernard, "L'arquitetura, ièr, uèi, deman" in Entre dos Millenaris, IDECO, Pueg-Laurènç, IDECO, 2009.
  • Dictionnaires :

  • Fettuciari Jòrgi, Martin Guy, Jaume Pietri, Dictionnaire Provençal-Français, Editions CREO, Provença, Diffusion Edisud, Aix-en-Provence, 2003.
  • Lebre Elie, Martin Guy, Moulin Bernard,
  • Dictionnaire de base Français Provençal, Editions CREO, Provença, Diffusion Edisud, Aix-en-Provence, 2004.
  • Mistral Frédéric, Lou Tresor dóu Felibrige, Editions Marcel Petit C.P.M, Barcelone, Espagne, 1979.

(1) "Il y a 'tâche' dans la mesure où l'action est le fait d'un ou plusieurs sujets qui mobilisent statégiquement les compétences dont ils disposent en vue de parvenir à un résultat déterminé. La perspective actionnelle prend en compte les ressources cognitives, affectives, volitives et l'ensemble des capacités que possède et met en oeuvre l'acteur social." Cadre européen commun de référence pour les langues, ch. 2,1. Dins lo projècte de senhalica, s'agís segondàriament de realizar de panèus e de lei revirar au provençau e s'agís prioritàriament de comunicar sus l'operacion, de la rendre credibla puèi possibla en convéncer lei diferents partenaris de son interès. Es ben una tasca sociala e globala.
Lo cadre europenc definís (ch. 3) lei nivèus de competéncias que lei programas i fan referéncia. Lo nivèu B1 es lo "nivèu sulhet". Se caracteriza mai que mai per l'aprendissatge de l'argumentacion en lenga. Es lo nivèu requesit en lenga viva per lo palièr 2 dei collègis e la debuta dau licèu. Per lo bac, es lo nivèu de l'utilisator independent qu'es visat : B2. Mai leis escolans qu'an seguit un cursus bilingue son mai avançats e pòdon arribar en fin de licèu a C1... o mai !

Lenga e país d'òc, n°48, page 65 (06/2009)
Lenga e país d'òc - Far la senhaletica dau licèu