Estudis

Omenatge a dos primadièrs, Danisa Imbèrt e Ramon Chatbèrt

Marie-Jeanne Verny

Dins sos numeròs 41 e 42, Lenga e País d'òc donèt la paraula a quatre primadièrs que dubriguèron la dralha d'un ensenhament modèrn de l'occitan : Elèna Gracià, Jòrgi Gròs, Robèrt Lafont e Andrieu Lagarda. N'auriam pogut evocar tantes maites qu'avèm agut l'astre de conéisser, sens pro presar la riquesa que portavan, e que nos an daissats dins las doas darrièras decenias, Pèire Lagarda, de Tolosa, Jòrgi Gibelin de Grassa, o Aimat Serre de Nimes, per exemple. Sovetam que los arquius sieus sián estudiats per de cercaires. De segur qu'i trobaràn matèria per comprene cossí d'unes se batèron per tornar, pauc a cha pauc, l'occitan dins l'escòla que l'aviá fòrabandit.

Elèna Gracià ditz aquí, l'importància del ròtle d'una autra primadièra Danisa Imbert, que bailejèt, amb ela, los Cahiers Pédagogiques de l'IEO, que poiriam, mai o mens considerar coma precursors de nòstra revista.

E mai voldriam saludar aquí un autre sabent modèst, lo Ramon Chatbèrt, que las edicions Vent Terral venon de ne publicar un libròt plan concebut : Lire et écrire l'Occitan. La quita Elèna Gracia podiá pas mancar de saludar aquel collèga de lucha e de reflexion, tant coma Robèrt Lafont que ne lausava totjorn l'intelligéncia de sa compreneson de la lenga, e un de sos editors, Jòrdi Blanc, de Vent Terral. Los mercejam d'aver autorizat Lenga e País d'òc a reprene los articles que faguèron al moment de la despartida del paure Ramon Chatbèrt.

Document :Omenatge a Danisa Imbèrtt

Document :La garba de Ramon Chatbèrt

Document :La normalitat lingüistica, es a Chatbèrt que la devèm

Document :Adieu Ramon !

Document :Legir e escriure l'occitan

Lenga e país d'òc, n°45, page 5 (06/2006)
Lenga e país d'òc - Omenatge a dos primadièrs, Danisa Imbèrt e Ramon Chatbèrt