Notas de lectura
Faridondeta/revira-te
Eliana Gauzit.
coedicion Institut Occitan/Atlantica,
248 p., 20 euròs.

Per transmetre la lenga, i a pas de mejans mai agradius ni mai eficaces que los que, de tot temps, la tradicion emplegava: las sornetas, las devinalhas, los contes, las cançons e los jòcs.

Aquò's dins aquel tresaur de mai en mai desconegut e gaireben oblidat que seriá bon de posar encara per sensibilizar los mainatges a la cultura nòstra.

Es çò qu'a inspirat a Eliana Gauzit l'idèa de fargar un recuèlh de jòcs cantats, rondas e coblets a dançar. Jol títol Faridondeta/revira-te, lo libre recapta un brave centenat de pèças causidas dins lo repertòri de las divèrsas regions d'Occitània e judiciosament classadas segon lor categoria e lor emplec. Figura per caduna la particion musicala, lo tèxt original seguit d'una traduccion e de nòtas explicativas en òc e en francés.

Una bona introduccion mòstra la plaça importanta que ten aquela matèria dins nòstre patrimòni e l'interès de la tornar metre en circulacion, en l'adaptant o la modernizant se l'òm vòl. De comentaris, de referéncias, una bibliografia e un indèx venon en complement a la fin de l'obratge per ne far un ensemble ric, coerent e d'una utilizacion aisida.

Aquí un aplech que ne tiraràn profièit totas las personas que son cargadas de l'educacion dels mainatges de 3 a 10 ans dins totas las escòlas e centres de vacanças coma -aquò va sens dire- dins las calandretas e las classas bilingüas...

Andrieu Lagarda.

Lenga e país d'òc, n°43, page 77 (10/2005)
Lenga e país d'òc - Faridondeta/revira-te